Omtale av konferansen
Les meir om heile Fjordkonferansen på https://fjordkonferansen.no/fjordkonferansen-2024/
Regional konkurransekraft kan definerast på ulike vis, alt etter fagtradisjon og problemstilling. Ein brei definisjon av omgrepet kan vera: Den evna ein region har til å betra leve- og livsstandarden i regionen.
Dette inneber at graden av konkurransekraft i ein region er påverka av ressurstilgangen i vid forstand, som til dømes tilgangen på næringsareal, på arbeidskraft, på historiske og kulturelle verdiar i regionen, på fysisk infrastruktur, på helsetenester og på utdanning, forsking og fagkompetanse i regionen.
Konkurransekrafta i ein region er óg påverka av korleis dei ulike ressursane vert kopla saman. Dette gjeld utviklinga av innovative evner i arbeidsstyrken, teknologi i private og offentlege verksemder, dei organisatoriske evnene til tilsette og leiarar i privat og offentleg sektor og korleis produkta og regionen vert marknadsført.
Konkurransekrafta til ein region vil og bli påverka av handlingane til offentlege og private verkemiddelaktørar.